ရမှတ်(၁၀၀)ရယူပြီး ဂိုးကွာခြားချက်အသာနဲ့ ချန်ပီယံရှစ်ချန်ပီယံဖြစ်ခဲ့တဲ့ လိဒ်စ်ယူနိုက်တက်

ချန်ပီယံရှစ်ပြိုင်ပွဲမှာ ရမှတ်(၁၀၀)နဲ့အထက်ရတဲ့အသင်းတွေအရင်က ရှိခဲ့ဖူးပါတယ်။ ၁၉၉၉ ခုနှစ်မှာ ဆန်းဒါးလန်းအသင်းက (၁၀၅)မှတ်အထိရယူကာစံချိန်တင်ခဲ့ပြီး ဒီစံချိန်ကို ၂၀၀၆ ခုနှစ်မှာ ရက်ဒင်းအသင်းက (၁၀၆)မှတ်နဲ့ စံချိန်ရိုက်ချိုးခဲ့ပါတယ်။

ဒီလို (၁၀၀)မှတ်အထက်ရယူနိုင်တဲ့အသင်းတွေပေါ်ထွက်ခဲ့ဖူးပေမယ့် တစ်ရာသီအတွင်း(၁၀၀)မှတ်(၂)သင်းထွက်ပေါ်လာတာက ဒီရာသီမှာ ပထမဆုံးအကြိမ်ဖြစ်ပါတယ်။

ချန်ပီယံရှစ်ပြိုင်ပွဲနောက်ဆုံးပွဲစဉ်(၄၆)ကို ဒီနေ့ကစားခဲ့ရာမှာ ဇယားထိပ်အဆင့်(၁၊ ၂)က လိဒ်စ်အသင်းရော၊ ဘန်လေအသင်းပါ နိုင်ပွဲကိုယ်စီရယူပြီး နှစ်သင်းစလုံး ရမှတ်(၁၀၀)မှတ်စီနဲ့ ရာသီကို အဆုံးသတ်ခဲ့ကြတာပါ။

ဒါပေမယ့် ဂိုးကွာခြားချက်မှာ လိဒ်စ်ယူနိုက်တက်က (+၆၅)ဂိုး၊ ဘန်လေက (+၅၃)ဂိုးရှိခဲ့တာကြောင့် လိဒ်စ်အသင်းက နှာတစ်ဖျားအသာနဲ့ ချန်ပီယံဆုကို ရယူသွားနိုင်ခဲ့ပါတယ်။

လိဒ်စ်အသင်းက ရာသီနောက်ဆုံးပွဲမှာ ပလိုင်မောက်ကို (၂-၁)ဂိုးနဲ့ နိုင်ခဲ့တယ်ဆိုပေမယ့် ပြိုင်ဘက်ကို ဦးဆောင်ဂိုးပေးခဲ့ရတဲ့အပြင် အနိုင်ဂိုးကိုလည်း ထပ်ဆောင်းအချိန်ပို(၉၀+၁)မိနစ်မှ သွင်းယူနိုင်ခဲ့ပြီး ကံကောင်းခဲ့တာပါ။ ဘန်လေကတော့ မီဝေါလ်အသင်းကို (၃-၁)ဂိုးရလဒ်နဲ့ နိုင်ခဲ့ပါတယ်။

လိဒ်စ်အသင်းရော၊ ဘန်လေပါ ပရီးမီးယားလိဂ်ကို တိုက်ရိုက်တန်းတက်ခွင့်ရခဲ့ပြီး အဆင့်(၃၊ ၄၊ ၅၊ ၆)က ရှက်ဖီးယူနိုက်တက်၊ ဆန်းဒါးလန်း၊ ကိုဗင်ထရီ၊ ဘရစ္စတိုးလ်စီးတီးအစရှိတဲ့အသင်းတွေက ပရီးမီးယားလိဂ်တန်းတက်ခွင့်တစ်နေရာအတွက် Play-offs ကစားရမှာပါ။

လိဒ်စ်ယူနိုက်တက်အသင်းဟာ ချန်ပီယံရှစ်ပြိုင်ပွဲမှာ (၅)ကြိမ်မြောက်ချန်ပီယံဖြစ်ခဲ့တာဖြစ်ပြီး ဒီပြိုင်ပွဲသမိုင်းတစ်လျှောက် ရမှတ်(၁၀၀)မှတ်နဲ့အထက်ရတဲ့အသင်းတွေထဲမှာ လိဒ်စ်ယူနိုက်တက်နဲ့ ဘန်လေတို့ဟာ (၇)သင်းမြောက်နဲ့(၈)သင်းမြောက်အသင်းတွေဖြစ်လာခဲ့ပါတယ်။

ချန်ပီယံရှစ်ပြိုင်ပွဲမှာ ရမှတ်(၁၀၀)မှတ်နဲ့အထက်ရဖူးတဲ့အသင်းများ

Reading 2005/06 – 106 points
Sunderland 1998/99 – 105 points
Newcastle United 2009/10 – 102 points
Leicester City 2013/14 – 102 points
Fulham 2000/01 – 101 points
Burnley 2022/23 – 101 points
Leeds United 2024/25 – 100 points
Burnley 2024/25 – 100 points